சரிவை சந்திக்கும் ஐ.டி. நிறுவனங்கள் - முக்கிய காரணம் இதோ..

மும்பை:

டாடா கன்சல்டன்சி சர்வீசஸ் (டிசிஎஸ்), இன்ஃபோசிஸ், எச்சிஎல் டெக்னாலஜிஸ், டெக் மகிந்திரா, விப்ரோ உள்ளிட்ட பெரிய நிறுவனங்களின் வருவாய் வளர்ச்சி முந்தைய காலாண்டுடன் ஒப்பிடும்போது குறைவாக இருக்கும் என ஆய்வு நிறுவனங்கள் கணித்துள்ளன. நடுத்தர நிறுவனங்களில் வளர்ச்சி ஓரளவு அதிகமாக இருக்கலாம் என எதிர்பார்க்கப்படுகிறது.
கோடக் இன்ஸ்டிடியூஷனல் ஈக்விட்டீஸ் கணிப்பின்படி, எச்சிஎல் டெக்னாலஜிஸ் வருவாய் காலாண்டு அடிப்படையில் 2% உயரலாம். இன்ஃபோசிஸ் 1.1%, டெக் மகிந்திரா 1.6%, டிசிஎஸ் 0.5% வளர்ச்சி காணலாம். விப்ரோவின் வருவாய் 1% குறையலாம் என மதிப்பிடப்பட்டுள்ளது.

நடுத்தர நிறுவனங்களில் பெர்சிஸ்டென்ட் சிஸ்டம்ஸ் 7%, கோஃபோர்ஜ் 4.5%, எல்டிஐ மைண்ட் ட்ரீ 1% வளர்ச்சி காணலாம் என கணிக்கப்பட்டுள்ளது. பெரிய ஒப்பந்தங்கள் கிடைப்பது இந்த நிறுவனங்களின் வருவாய் வளர்ச்சிக்கு ஆதரவாக இருக்கலாம்.
செயற்கை நுண்ணறிவு பயன்பாடு அதிகரிப்பதால் பாரம்பரிய ஐடி சேவைகளுக்கான கட்டணத்தில் அழுத்தம் ஏற்பட்டுள்ளது. ஏஐ மூலம் உற்பத்தித் திறன் அதிகரிப்பதால் கிடைக்கும் பலனை வாடிக்கையாளர்களுடன் பகிர வேண்டிய நிலை நிறுவனங்களுக்கு ஏற்பட்டுள்ளது. புதிய ஏஐ சார்ந்த வருவாய் இதை முழுமையாக ஈடுகட்டும் அளவுக்கு இன்னும் வளரவில்லை.

பெரிய ஒப்பந்தங்கள் தொடர்ந்து கிடைத்தாலும், அவை உடனடியாக வருவாயாக மாறுவதில்லை. ஒப்பந்தங்களைச் செயல்படுத்தும் வேகம், வாடிக்கையாளர்களின் செலவினம் மற்றும் ஏஐ காரணமாக ஏற்படும் விலை மாற்றங்கள் ஆகியவை நிறுவனங்களின் செயல்பாட்டில் முக்கிய தாக்கத்தை ஏற்படுத்தக்கூடும்.
ரூபாய் மதிப்பு சரிவு ஏற்றுமதி சார்ந்த ஐடி நிறுவனங்களுக்கு ஓரளவு ஆதரவாக இருக்கலாம். அதேநேரம், அந்நியச் செலாவணி பாதுகாப்பு நடவடிக்கைகளால் ஏற்படும் மாற்றங்கள் சில நிறுவனங்களின் லாபத்தில் தாக்கத்தை ஏற்படுத்தக்கூடும்.

டிசிஎஸ் அக்டோபர் 8-ம் தேதி 2-ம் காலாண்டு முடிவுகளை வெளியிட உள்ளது. இதைத் தொடர்ந்து பிற முன்னணி ஐடி நிறுவனங்களின் முடிவுகள் வெளியாகும். வருவாய் வளர்ச்சி, புதிய ஒப்பந்தங்கள், லாப வரம்பு மற்றும் அடுத்த காலாண்டுக்கான நிறுவனங்களின் வழிகாட்டுதல் ஆகியவை முதலீட்டாளர்களின் கவனத்தில் இருக்கும்.