6 நிறுவனங்களின் ரூ.10 ஆயிரம் கோடி பொதுப் பங்கு - இந்த வாரம் வெளியீடு

ஜெட்வெர்க், டோன்போ இமேஜிங் உள்ளிட்ட ஆறு நிறுவனங்களின் ஆரம்பப் பொதுப் பங்கு வெளியீடுகள் இந்த வாரம் தொடங்குகின்றன. இவற்றின் மொத்த வெளியீட்டு மதிப்பு சுமார் ரூ.10,300 கோடியாகும்.

பெங்களூருவைச் சேர்ந்த ஜெட்வெர்க் நிறுவனத்தின் ரூ.5,012 கோடி பங்கு வெளியீடு அக்டோபர் 15-ம் தேதி தொடங்கி, 19-ம் தேதி நிறைவடைகிறது. பங்கு விலை ரூ.143–151 ஆகவும், குறைந்தபட்ச விண்ணப்ப அளவு 99 பங்குகளாகவும் நிர்ணயிக்கப்பட்டுள்ளது.

எச்.டி. ஃபயர் புராடெக்ட் நிறுவனத்தின் சுமார் ரூ.712 கோடி வெளியீடு அக்டோபர் 13–15 தேதிகளில் நடைபெறுகிறது. பங்கு விலை வரம்பு ரூ.258–271 ஆகும்.
ஃப்யூஷன் சிஎக்ஸ் நிறுவனத்தின் ரூ.702 கோடி வெளியீடு அக்டோபர் 14-ம் தேதி தொடங்கி, 16-ம் தேதி முடிவடைகிறது. இதில் ரூ.500 கோடி புதிய பங்குகளும், ரூ.202 கோடி தற்போதைய பங்குதாரர்களின் பங்கு விற்பனையும் அடங்கும். விலை வரம்பு ரூ.275–289 ஆக நிர்ணயிக்கப்பட்டுள்ளது.

போன்ஃபிக்லியோலி டிரான்ஸ்மிஷன்ஸ் ரூ.2,534 கோடி, டோன்போ இமேஜிங் ரூ.852 கோடி, சஹஜானந்த் மெடிக்கல் டெக்னாலஜீஸ் ரூ.475 கோடி மதிப்பிலான வெளியீடுகளை மேற்கொள்கின்றன. இவை அக்டோபர் 15-ம் தேதி தொடங்கி, 19-ம் தேதி நிறைவடைகின்றன.

இவற்றின் பங்கு விலை வரம்புகள் முறையே ரூ.558–586, ரூ.665–700, ரூ.327–344 ஆகும். மூன்று வெளியீடுகளும் தற்போதைய பங்குதாரர்களின் பங்கு விற்பனையாக அமைந்துள்ளதால், விற்பனைத் தொகை நிறுவனங்களுக்குச் செல்லாது.

இதனிடையே, ஜியோ பிளாட்ஃபார்ம்ஸின் வெளியீட்டு மதிப்பு சுமார் ரூ.30,200 கோடியாக இருக்கலாம் என தகவல்கள் தெரிவிக்கின்றன. இது உறுதிசெய்யப்பட்ட இறுதி வெளியீட்டுத் தொகையாகக் கருதப்படவில்லை.

நிறுவனங்களின் மதிப்பீடு, நிதிச் செயல்பாடு, வளர்ச்சி வாய்ப்புகள் ஆகியவை முதலீட்டாளர் வரவேற்பை நிர்ணயிக்கும் எனச் சந்தை நிபுணர்கள் தெரிவித்துள்ளனர். சந்தை ஏற்றத்தாழ்வுகளும் அண்மையில் பட்டியலிடப்பட்ட நிறுவனங்களின் செயல்பாடும் விண்ணப்ப அளவையும் அறிமுக நாள் வருமானத்தையும் பாதிக்கலாம் என்றும் அவர்கள் கூறியுள்ளனர். வெளியீடுகளின் எண்ணிக்கை அதிகரிப்பது மட்டுமே வலுவான முதலீட்டாளர் தேவையை உறுதிசெய்யாது என்றும் தெரிவித்துள்ளனர்.