வெளிநாட்டுப் பெயர்களால் வளர்ந்த இந்திய ஆடை பிராண்டுகள்

இந்தியாவில் தயாரிக்கப்படும் ஆடைகளுக்கு மேற்கத்திய பெயர்களை (வெளிநாட்டுப் பெயர்) சூட்டி, வெளிநாட்டுப் பிராண்டுகளைப் போன்ற தோற்றத்தை ஏற்படுத்தி வெற்றிபெற்ற நிறுவனங்கள் பல உள்ளன. லூயிஸ் பிலிப், பீட்டர் இங்கிலாந்து, ஆலன் சோலி, பார்க் அவென்யூ, மான்டே கார்லோ, டா மிலானோ உள்ளிட்ட பிராண்டுகள் இதற்கு உதாரணங்களாக உள்ளன. வெளிநாட்டுப் பொருள்கள்தான் தரமானவை என்ற மக்களின் எண்ணத்தைப் பயன்படுத்தி, இந்திய நிறுவனங்கள் தங்கள் ஆடைகளுக்கு வெளிநாட்டுப் பெயர்களை வைத்தன.

பீட்டர் இங்கிலாந்து 1988-லும், லூயிஸ் பிலிப் 1989-லும், ஆலன் சோலி 1993-லும் அறிமுகப்படுத்தப்பட்டன. அமெரிக்கப் பிராண்டான வான் ஹியூசனின் பெயர், இந்தியாவில் உரிம ஒப்பந்தத்தின் அடிப்படையில் பயன்படுத்தப்படுகிறது.

இதேபோல, ரேமண்ட், பார்க் அவென்யூ, ஃப்ளையிங் மெஷின், மான்டே கார்லோ, டா மிலானோ போன்ற பிராண்டுகளும் இந்தியாவில் உருவாக்கப்பட்டவை. மான்டே கார்லோ, லூதியானாவைச் சேர்ந்த ஓஸ்வால் வூலன் மில்ஸ் நிறுவனத்துடன் தொடர்புடையது. ஃப்ளையிங் மெஷின், அகமதாபாத்தைச் சேர்ந்த அரவிந்த் மில்ஸ் நிறுவனத்தால் அறிமுகப்படுத்தப்பட்டது. டா மிலானோ இந்தியாவில் தோல் பொருள்களை விற்பனை செய்யும் பிராண்டாகும்.

தரம், விலை, கடைகளின் தோற்றம் ஆகிய மூன்று அம்சங்கள் இந்தப் பிராண்டுகளின் வளர்ச்சிக்கு உதவின. சர்வதேசத் தரத்திலான தயாரிப்புகள், வெளிநாட்டுப் பிராண்டுகளைவிடக் குறைவான விலை, மேற்கத்தியப் பாணியிலான கடை அமைப்பு ஆகியவை வாடிக்கையாளர்களைக் கவர்ந்தன.

இந்தியாவில் பருத்தி, கம்பளி, பட்டு உள்ளிட்ட ஆடைத் துணிகள் அதிக அளவில் உற்பத்தி செய்யப்படுகின்றன. திருப்பூர் உள்ளிட்ட நகரங்களில் தயாரிக்கப்படும் ஆடைகள் சர்வதேசச் சந்தைகளுக்கும் செல்கின்றன. ஜாரா, எச் அண்ட் எம் போன்ற உலகளாவிய நிறுவனங்களின் விநியோகச் சங்கிலியிலும் இந்திய ஆடை உற்பத்தித் துறைக்கு முக்கியப் பங்கு உள்ளது.

தற்போது மன்யவர், ஃபேப்இந்தியா, சோக் போன்ற இந்தியப் பெயர்களைக் கொண்ட பிராண்டுகளும் வளர்ந்து வருகின்றன. இந்திய ஆடை உற்பத்தித் துறை சர்வதேச அளவில் முக்கியத்துவம் பெற்றிருந்தாலும், உள்நாட்டுச் சந்தையில் மேற்கத்தியப் பெயர்கள் மூலம் வாடிக்கையாளர்களின் நம்பிக்கையைப் பெற வேண்டியிருந்தது. இந்த முரண்பாடு, இந்திய ஆடைச் சந்தையின் குறிப்பிடத்தக்க வணிகப் போக்காக உள்ளது.