இந்தியாவில் ஐபிஓ வெளியிடத் தயாராகும் 3 பன்னாட்டு குளிர்பான நிறுவனங்கள்

கார்ல்ஸ்பெர்க், பெர்னோ ரிக்கார்டு, கோகோ கோலா ஆகிய பன்னாட்டு குளிர்பான நிறுவனங்கள், தங்களது இந்திய தொழில்பிரிவுகளைப் பங்குச்சந்தையில் பட்டியலிடுவதற்கான நடவடிக்கைகளை வெவ்வேறு கட்டங்களில் மேற்கொண்டு வருகின்றன. எனினும், பங்கு வெளியீட்டுக்கான காலக்கெடு உறுதிசெய்யப்படவில்லை.

பிரான்ஸைச் சேர்ந்த மதுபான நிறுவனமான பெர்னோ ரிக்கார்டு, இந்தியத் தொழில்பிரிவின் ஐபிஓவுக்கான ஆயத்தப் பணிகளைத் தொடர்கிறது. இருப்பினும், வெளியீட்டை மேற்கொள்வதற்கு இயக்குநர் குழுவின் ஒப்புதல் இன்னும் கிடைக்கவில்லை.

வரும் மாதங்களில் முடிவு எடுக்கப்பட்டால் தயாராக இருப்பதற்காக, முன்னேற்பாடுகளைத் தொடருமாறு இயக்குநர் குழு அறிவுறுத்தியுள்ளதாக நிறுவனத்தின் நிதி மற்றும் தொழில்நுட்பப் பிரிவு செயல் துணைத் தலைவர் மோவ் குரோய்சா தெரிவித்தார்.
செப்டம்பர் காலாண்டில் இந்தியாவில் இந்நிறுவனத்தின் விற்பனை 19 சதவீதம் உயர்ந்துள்ளது. அமெரிக்காவுக்கு அடுத்தபடியாக, இந்தியா அதன் இரண்டாவது பெரிய சந்தையாக உள்ளது.

இதனிடையே, கோகோ கோலா நிறுவனம் தனது இந்தியப் பாட்டிலிங் தொழில்பிரிவைப் பட்டியலிடுவதற்கான வாய்ப்புகளை ஆராய்கிறது. ஹிந்துஸ்தான் கோகோ கோலா பெவரேஜஸின் தாய் நிறுவனமான ஹிந்துஸ்தான் கோகோ கோலா ஹோல்டிங்ஸ் வாயிலாக இந்த நடவடிக்கை பரிசீலிக்கப்படுகிறது.

சந்தை நிலவரம், ஒழுங்குமுறை அனுமதிகள் உள்ளிட்டவற்றுக்கு உட்பட்டு, மும்பை மற்றும் தேசியப் பங்குச்சந்தைகளில் பட்டியலிடுவதற்கான ஆரம்பகட்டப் பணிகள் நடைபெறுவதாக நிறுவனம் ஜூனில் அறிவித்திருந்தது.
கடந்த ஆண்டு, ஹிந்துஸ்தான் கோகோ கோலா ஹோல்டிங்ஸ் நிறுவனத்தின் 40 சதவீதப் பங்குகளை ஜூபிலன்ட் பார்தியா குழுமம் வாங்கியது. கோகோ கோலாவுக்கு இந்தியா ஐந்தாவது பெரிய சந்தையாகும்.

கார்ல்ஸ்பெர்க்கின் இந்திய வருவாய், 2026 நிதியாண்டில் 2.2 சதவீதம் குறைந்து ரூ.8,708.8 கோடியாக இருந்தது. பெர்னோ ரிக்கார்டின் 2025 நிதியாண்டு விற்பனை ரூ.27,445.80 கோடியாகப் பதிவானது. நிறுவனங்களின் சமீபத்திய நிதிநிலை முடிவுகள் தொடர்பான முதலீட்டாளர் கலந்துரையாடல்களில், மூன்று நிறுவனங்களின் மூத்த நிர்வாகிகளும் இந்தப் பட்டியலிடும் திட்டங்களின் தற்போதைய நிலவரத்தை விரிவாக விளக்கினர்.

இந்த மூன்று நிறுவனங்களின் முயற்சிகளும், இந்திய வணிகத்தின் மதிப்பைப் பங்குச் சந்தை மூலம் வெளிக்கொணர்வதில் பன்னாட்டு நிறுவனங்கள் காட்டும் ஆர்வத்தை வெளிப்படுத்துகின்றன.